Kqab'ij chi le qach'ab'al are la' le sib'alaj nim ub'antajik chqawach oj. Chema e k'i keb'inik chi are sib'alaj rajawaxik keta'max le kaxlan tzij(Español) ma xaq si are chi la' kkoj kamik. Rumal k'u la' e k'o winaq chech taq we q'ij kamik xaq xew le kaxlan tzij chik kkik'ut chkiwach le kalk'wal; na kekich'ab'ej ta chi pa qach'ab'al.Wa' we jun chomanik ri' are le e mu'sib' xetikow aq'anoq. Jela' xub'ij jun in chwech. Je wa' kub'ij ri': le waral pa Nawal ja' taq xaq xew pa k'iche' kech'ab'ex wi le ak'alab'. Rajawaxik ya la' kk'ut le kaxlan tzij chkiwach are chi we ke'l b'i pa jun tijob'al chik na k'o ta k'ax ke'kiriqa'. Xa xintze'j in ri' are taq xinto, kataq ta ne ri' xaq si tzij na qeta'm ta kujch'aw oj pa kaxlan tzij. Rumal k'u ri' je wa' xinb'ij in chech: Tzij la' le kab'ij chema chuq rajawaxik kk'ut le qach'ab'al k'iche' chkiwach le ak'alab' ma are la' qas qach'ab'al oj; la' le kaxlan tzij xa jun ukab' qach'ab'al oj la'. Na ya'tal taj kqasach uwach le qach'ab'al k'iche' rumal reta'maxik le kaxlan tzij__ xincha in chech. __Janeche, chuq na xa ta kinq'at uwach in la' __ xaq b'a kcha chik.
Rumal k'u la' kinb'ij in, rajawaxik utzalaj uk'oxomaxik wa' riri' chqab'ana oj. Tzij na k'u la' chi rajawaxik kqeta'maj kujch'aw pa Español, pa Inglès, Portugués jacha ne chuq pa taq nik'aj chik ch'abal cher sib'alaj kkoj pa ronojel le uwachulew chema na k'o ta chwa rajawaxik kqasach uwach le qach'ab'al
